كلية الهندسة كلية ام مفرمة؟

معلش الوضوع المرة دى مش فى السياسة الموضوع عن واقع غبى بعيشه كل يوم وهو كلية الهندسة انا مش خايف لو حتأذى بس ادينى قولت اللى عندى مش حتفرق لو العميد شافه و انا بصراحة اتمنى يشوفه بس للاسف مش حيشوفه عشان انا مش اخوان و مش معارضة و لا وطنى فصوتى مش حيوصل بس لتمنى اى حد يقرا يقدر بس يالا ما علينا دى بوابة كلية الهندسة جامعةالاسكندرية موجودة على شارع ابوقير اكبر شوارع اسكندرية و اللى بيعدى فيه كل يوم ملايين من الناس وتلاقى واحد منهم مثلا حماده راكب مع بابا العربية و حماده بيبص بذهول بالمدخل الكبير و اللى حواليه جناين فى كل حته و شجر و دلع و بابا يقول لحماده يلا بقى ورينا شطارتك و هات مجموع فى الثانوية و انقطع عن ملاذات الحياه و عشان تدخل هندسة و واحدة مثلا سوسن اللى فى تجارة بتقول ياحسرتاه ياريتنى كنت دحيت شوية و دخلتها اوواحد مثلا حسنين يقول لصاحبه بص ولاد ال.......شكلهم عامل ازاى مكنتش انا اولى منهم ويضحك بس طبعا ميعرفش اللى بيحصل جواها حاجة كده زى مديرية الامن مبنى فخم جدا بس ايه اللى جواه الله اعلم يالا ما علينا مش موضوعنا بس اللى ميعرفوش حمادة و سوسن و حسنين ان دخول هندسة سهل جدا لانك لو مجرد لو حفظتلك شوية عربى على شوية كلمات انجليزى على سؤالين ستورى وشوية مسائل رياضة على شوية فيزيا هى روشتة الثانوية افشل نظام تعليمى على مستوى العالم والله يحرق التعليم المصرى و اللى حطوا المناهج خلينا فى موضوعنا مش عارف انا ايه الملل ده
كلية الهندسة الاسطورة الزائفة انا عارف ان الكلام سابق لاوانه انا يادوب بقالى 7 شهور بس انا واثق من كلامى انها مقلب كبير و ان اصلا العيب فى النظام القاعدة اللى خليت دول طلبة هندسة و دول اللى مسئولين عنها انا حتكلم عن وقائع حصلت معايا انا شخصيا و يعنى مثلا اللى يخللى واحد ميعرفش الالف من كوز الدرة واقف فى قسم كمبيوتر لمجرد انه عنده مخ كل وظيفته انه يحفظ عنده هارد 100 جيجا مستعد يحفظ كتاب فى كل مادة برقم الصفحة و ميعرفش فى حياته كلها من اولها لاخرها غير انه طالب فى كلية هندسة كل وظيفتةه انه يذاكر و نسى ادميته ونسى انه بنى ادم لازم يعيش حياته مع اصحابه سواء بنات ولاد مش حتفرق نسى حق اى شىء عليه غير انه لازم يبقى من الاوائل عشان لما يطلع يشتغل بينسوا اصحابهم و اى حاجة ممكن تعطله عن شعاره المفضل مصلحتك اولا وده ليه عشان يبقى فى قسم كمبيوتر او كهربا يعنى مثلا فى واحد معايا فى السكشن انا اتوقعله اوائل دفعة اذا مكنش الاول و للاسف الشديد و انا بجد اسف لانى بقول كده مش عارف يحط الديسك ازاى فى الكمبيوتر حاجة تكسف مش كده معنى كده دى دعوة للفشل بس ده واقع والله حقيقة
وانا معايا فضيحة بالصور لاذكى طلبة فى اسكندرية و هم الفروض كده يوم نتيجة الميدترم ميكانيكا هو بصراحة لعيب مش فيهم لوحدهم و اكيد فى الذكى اللى اخد قرار انه يحط نتيجة 3200 طالب على لوحة 1*2 متر طبعا النتيجة بمجرد متعلقت مفيش 10 دقايق مكنش فى و لا ورقة فى مكانها و كله اتقطع مع ان لو كل واحد كان دخل شافها فى هدوء و طلع كان حتطول شوية بس كفاية انه عمل منظر كويس لنفسه و سمعة كويسة لكليته بس للاسف مفيش دماغ انا لقيت واحد ماشى بكشف قولتله معاك كشف كذا يا كابتن بصلى و كانى شتمته يعنى انا الموضوع ده اسفزنى

د منظرهم اول مالورق اتعلق كتير اوى واللوحة صغيرة صح؟

ده بقى بعد مالورق طاااار و كل شوية اتلموا على كشف

طبعا حتكلم دلوقتى عن شخصيتى المفضلة فى الكلية اكتر واحد بكرهه فيها تخيلوا ده يبقى عامل ازاىده وهو عمرو حسين اشهر معيد رياضة فى الكلية و ده ليا حكاية معاه حلوة اوى انا بما انى مش بحضر محاضرات نصحنى الناصحون اخد كورس فرحت لمييييييييييين عمرو حسين حضرت معاه اول حصة معجبنيش النظام المكان ضيق و الناس كتير و هو نفيخ طحن وكان فاتنى كتير قولت خلاص مش حكمل المهم عدت الايام و لقيت عمرو حسين و اقف عليا فى لجنة امتحان الميدترم قولت مش مهم مش حياخد باله دى هى حصة لقيت دهابتدى يرذل طبعا طول الوقت باصص عليا وشوية مع الزملاء الصراحة يعنى قولت عادى تانى يوم دخلت لجنة تانية اصل السكشن بيمتحن فى مكانين فرحت المكان التانى وكان امتحان رياضة ملعبه لقيت ده جه عندنا اللجنة مهو انا ياهنا يا هناك لقيته جه و وصى المراقبين هما كانوا اتنين واحدة بتكتب و التانى بيلعب فى الموبيل اتكلم معاها شوية لقيتها بتقوللى انت تعالى يمين شوية فتحركت وهو يقوللى مش عجبك ولا ايه و بعديها يشوية راح اتكلم مع التانى و قاللوا خليك مع الاخ و شاور عليا التانى ساب كل حاجة ووقف جنبى و انا عشان اغيظه كل شوية ابصله و اضحك اصل مكنتش عارف احل حاجة ففاضى بقى ارذل براحتى و تانى يوم طبعا عمرو حسين عدى من جنبى و بصللى بقرف تقولش جوز امه وده كان تفكير معيد فى كلية هندسة حاجة تكسف اوى المفروض
انا كده اكون اديلكم مواقف مع دكاترة و طلبة ومعيدين كلية الهندسة اللى المفروض انهم احسن من بتوع الطب على اساس ان كلامهم كله حفظ والله اعلم
والله انا خايف اوى اطلع زى الناس دى انا اهون عليا اعيش طبيعى احسن من انى احسن انفخ مهندس على وجه الارض بدل مبقى بعد 5 سنين زى الصورة

منظرنا كمان 5 سنين يا لههههووووووووى ده بقى منتدى هندسة افسرلكم الصورة لو مش باينة

1 يالا نذاكر مع بعض

2 عايز تقول ايه لطلاب الاخوان

3جدول اولى ميكانيكا

اشمعنى مش عارف تقريبا لغو الكلية ماعدا اولى ميكانيكا

4موقع هندسة اون لاين

5 منتدى كلية الهندسة رائع جدا
بالذمة ده منتدى لكلية محترمة ده بتاع تجارة انضف

ولا موقع الكلية الرسمى عقييييييييييييييييييييييييييييييييييييييييييييم

www.engalex.edu.eg

وده المكان اللى بقعد فيه مع اصحابى

دى بقى خريطة كاملة للكلية

ده بقى المدرج على طول كده على اخره اللهم زيد و بارك
يالا اخرها ربنا يعدينا منها على خير



حسبى الله و نعم الوكيل

انا مجرد واحد

انا واحد من 70000000 واحد منهم الرئيس و الحرامى و النصاب و منهم الجعان و الشبعان والشبعان اوى والطماع و اللى عايز اللى مع غيره مع انه مش معاه حاجة وفى ناس متشيكة ومتأيفة و كله تمام التمام و فى ناس مش لاقية حتة تحط رجلها فيها من الزحمة و فى اللى كل عيل من عياله معاه عربية و فى مش معاه حتى يتشعلق فى الاتوبيس و هنا فى اسكندرية تشوف العجب سوق باكوس وفلل زيزينيا بينهم شارع و فلل كفر عبده و زعربانه برده بينهم شارع وبين سموحة و العشوائيات حوليها برده مفيش ولا قدام قصر راس التين بحرى بناسه الطيبين حاجة برده غريبة ما علينا
كل واحد فينا لازم يبص حوليه و يشوف وضعه ايه فى البلد حيلاقى نفسه ولا حاجة طبعا انما المقامات محفوظة لاصحابها احنا ملناش حق نعيش احنا بس نخدم الكبار و هم يحطوا علينا احنا ملناش قيمة اللى يتعملهم حساب فى البلد مين ظباط الشرطة و المسئولين الكبار بس و مش اى مسئولين كمان فى ناس مجرد مبيغلطوا بيخرجوا من بلاط الكبار اوى
امتى بقى يحس ان له قيمة لما نلاقى كل يوم كليب واحد بيضرب فى لق ربنا ياريتها مطلعت اصلا على الاقل الواحد كان حس ان لهكرامة لحد ميجى عليه الدور بجد حاجة تقرف
حسبى الله ونعم الوكيل

الناس اللى بتصقف اختلافات كبيرة

السلام عليكم

التصقيف حاجة بنعملها لتحية حاجة كويسة او احنا شايفينهاكده او فى حاجات برده ناس بتشوفها كويسة وناس بتتف عليها مثلا
يعنى انا مثلا بتفرج على متش و لقيت كورة حلوة اكيد حسقف

و فى ناس بتصقف لما تشوف مسرحية كويسة

فى ناس بتصقف لما بتشوف موقف بطولى

و دول ناس فى ناس تانين بيصقفوا بس على طريقيتهم
مثلا فى كليبات التعذيب الواحد مننا بيشوفها بيلعن الداخلية من اصغر صول للوزير و و احد زى الوزير بيقول بكل برود و السيجار فى ايده جود جوب يا رجالة ايوة كدة لازم تأدبوا ولاد الكلب ده شعب ميجيش غير بال....
واكيد فى تصقيفة تشجيع
وفى مثلا فى العراق لامه كلب زى بوش يشوف قصف فى كذا ولا قتل عدد مدنين فى كذا حيقول فى داهية ولاد ال.........
اهو يخفوا عدد و طبعا مش هو اللى بيصقف لوحده انما كلنا وراه مش احنا يعنى الحكام بتوعنا بالنيابة والله بيتعبو اهو هما مش بيتعبوا غير فى حاجتين الانتخابات و السياسة الخارجية
نرجع لموضوعنا الحكام بيصقفوا اهو واحد زى الراجل بتاعنا مكلف نفسه و الدولة فلوس عشان يكافىء سفاح العراق قائد القوات الامريكية بالذمة مش حاجة تحرق الدم
يالا اهو كلو تصقيف
فى ناس بتصقف لما تنجح صفقة مخدرات و دول يا عينى بيتصقف على قفاهم زى ملايين فى مصر يعنى فى ناس بتهرب بفلوس بره ويطلعولنا لسانهم دول يبقوا ايه مش بيصقفوا برده انما بقى اللى بيسرقوا و يقعدوا فى البلد دول بيتصقفلهم بس بينى و بينكم فى مجلس الشعب محدش يسيح
فى ناس بتصقف و تاخد فلوس يا بلاش انتوا عارفين قصدى عليه هالة شو الست دى فعلا اثبتت ان فى مصر مفيش حد تحت القانون
وحيتعمل منتديات و مش عارف ايه و حترجع وحتستقبل استقبال المنتصرين بالتصفيق من ناس طبعا مدفوعى الاجر
و حتكون الاعلامية هالة الشريفة بدل خضرة اصل خضرة ده اسم بلدى اوى
يالا احنا فى بلد كسكس تعيش
حسبى الله و نعم الوكيل

free kereem

عبد الكريم طالب قال رأيه لبسوه شوية قواضى محترمة و يا ترى الدور على مين بعد كده لو الواحد بيفضفض مع مراته ولا حاجة فى
البيت حيجيبوه من سريره انا مش عارف فاضلنا مكان ايه نتكلم فيه بحريتنا يعنى لا جرايد نافعة و لا وسائل اعلام و انترنت يعنى بعد كده كل واحد حيلاقى واحد واقف فى قفاه لو غلط حيديله انا مش فاهم الناس دى بتعمل كده ليه طيب بيقولو على عبد الكريم ازدراء اديان اللى مثلا قرا مدونته 10000 ده على اقصى تقدير امال الحيوانه اللى اسمها نوال السعداوى اللى بتتكلم ادام 1000000000 دى ايه مش بتنشر الفاحشة يعنى خلاص الضعيف اللى بيتكلم بصوت واطى هو اللى خطر على الاسلام يا جماعة لازم نعرف ان الدين مش حيتأثر زى عبد الكريم الاسم اكبر من عبد الكريم ولا مليون زيه لازم اننا نكون عارفين ان الاسلام حيفضل باقى متأثرش و بناس صيتهم اكبر من عبد الكريم و لا الست نوال خرة دى مجنونة سايبنها تخرف و تهيس انا متأكد الست دى بتبقى قاعدة ماسكة كانشة و جوزها بيرصلها الحجر وتطلع الافكار الخربانة بتاعتها
عار على مصر اللى بيحصل ده ان واحد زى ده فى السجن و التانية دى تسافر وتهرب من غير حتى محد يوجهلها حاجة قال ايه هى حسيت
حسبى الله و نعم الوكيل

لا للتوريث

موضوع مهم و ضرورى و حيوى وكل الناس بتتكلم عنه اليومين دول على اساس ان الرئيس ان شاء الله حيموت و حيمسك ابنه جمال ده موضوع عادى ابتسم انت فى مصر النظام الجمهورى الوحيد فىالعالم اللى بيحصل فيه توريث هو مصر ليه لان مصر ام الدنيا واقلب القدرة على فومها البنت متطلعش لامها مصر هى بلد المعجزات كل حاجة بتحصل فى الدنيا عكسها فى مصر على طول و يوم معملنا انتخبات وكسرنا القاعدة الخلافة فشلنا لان اكتر من 3\4 الشعب مرحش اصلا امال حننتخب امتى يا ناس
نرجع لموضوعنا التوريث ونسال ليه جمال بك حيبقى الريس ويكمل المسيرة اللى بدأها والده كل الناس بتقول جمال حيمسك انا عن نفسى مش عارف و لا يمكن اتعودوا طيب و هو لو المشيئة الالهية نزلت مين حيبقى الريس و هل حيكون فى انتخابات ومين المرشحين و هل حكونوا زى الاراجوزات زى المرة اللى فاتت والمرة الجاية الصباح حيطلع لابس كاجوال ويقول سيب الطربوش لازم نواكب العصر ولا يطلع واحد يقول انا ححارب اسرائيل طيب الشعب عايز الرئيس يبقى عامل ازاى او احنا كشعب الرئيس اللى يحكمنا يبقى عامل ازاى مثلا زى العراق صدام فعلا كان متفصل عليهم احنا شايفين بعد صدام العراق بيحصل فيها حروب اكتر من اللى فى الصومال ربنا بعتلهم الامريكان طلعوا على جتتهم ولا عايزين واحد زى اميل لحود لا بيحل و لا بيربط ده رئيس شرفى ولا عايزين واحد زى فيديل كاسترو ولا مجنون زى بوش و لا قيادى زى بتاع البرازيل اللى معرفش اسمه
هى مصر دلوقتى مش محتاجة واحد عسكرى احنا الاقتصاد بتاعنا متبهدل والله ......... محى الدين مخلاش فيها حاجة فلابد من دراسة الوضع عشان الرئيس لازم يكون من الناس عشان يكون عاش زيهم مش قصدى عامل يعنى انا قصدى يكون قضى كل حياته فى مصر مش يجيبوللى واحد ميعرفش غير انه اتولد فيها شاف الناس اللى اتعذبوا على ايد الشرطة و عاصر الحرامية و عارفهم يجيب ناس محترمة بدل العصابة اللى ممشينها شيلنى و اشيلك كله بيدارى على كله بقالهم20-25 سنة فيها و مشبعوش امال امتى حيبقى فى تغيير
لازم يبقى فى تغيير ده الواحد لما بيطول معاه سورىيعنى بيغيره امال لماالرئيس يطول يبقى محتاج ايه انما فى فئة مش بتحب التغيير هو
المحل اللى احنا عايشين فيه عاجبهم اوى و بياخدوا منه اكتر مبيدوا ومين عارف بكرة حيجرى ايه لسه واحب اقول لا للتوريث و نعم للتجديد ان شالله على ايد جمال او غيره مش حتفرق بس المهم نحس اننا فى بلدنا مش فى بلد الحكومة
وحسبى الله و نعم الوكيل

البداية

بسم الله
ابدأ التدوين و انشاء الله حكمل بسربنا يدينا الصحة والعمر انا هنا هكتب عن كل حاجة و اى حاجة وانتو شايفين الاسم صباح الغموض واحد الواحد ده ممكن يكون اى حاجة ممكن واحد ماشى فى الشارع ممكن واحد طالب او واحد كبير عجوز ممكن ظابط او دكتور او شحات او حرامى او كويس اوواحد متش او واحد شوط او دكتور فى الجامعة نفيخ او كويس او معيد او رجل امن غلبان و ممكن الواحد ده واحد شاى او واحد عيش او ممكن كلب يعنى انا حكتب اللى انا شايفه و خلاص عن السياسة او الكورة او الدراسة والكلية و حقول وجهة نظرى فى اللى بشوفه سواء بالايجاب او السلب وبتعليقاتكم انتوا ممكن تشاركونى الاراء دى وتقولو رأيكم عن اللى انا شايفه واللى عنده وجهة نظر تانية يقولها واختلاف الرأى لا يفسد للود قضية واعتقد ان التدوين حاجة كويسة وانا اتعرفت عليه عن طريق منير صاحبى هو اللى شجعنى وكمان اللى شجعنى اكتر محمد السيد انتيمى من اعدادى